ആപ്പിളിന്റെ ഇയര്‍ബഡുകള്‍ എപ്പോഴും വെള്ളനിറത്തില്‍ കാണപ്പെടുന്നതിന്റെ രഹസ്യം

ആള്‍ക്കൂട്ടത്തിനിടയില്‍ വെളള നിറത്തിലുള്ള ഇയര്‍ബഡുകള്‍ ധരിച്ച് നില്‍ക്കുന്ന ഒരാളെ കാണുമ്പോള്‍ പെട്ടെന്ന് മനസിലേക്ക് വരുന്നത് ആപ്പിള്‍ ഇയര്‍ഫോണ്‍ ആയിരിക്കും എന്നാവും അല്ലേ. പക്ഷേ എപ്പോഴെങ്കിലും ചിന്തിച്ചിട്ടുണ്ടോ മറ്റ് കമ്പനികള്‍ പല നിറങ്ങളിലും ഇയര്‍ഫോണുകള്‍ നിര്‍മ്മിക്കുമ്പോള്‍ ആപ്പിള്‍ മാത്രം എന്തുകൊണ്ടാണ് വെള്ള നിറത്തില്‍ ഇവ നിര്‍മ്മിക്കുന്നതെന്ന്. ഇത് വെറും ഡിസൈനിന്റെ ഭാഗം മാത്രമല്ല. അതിന് പിന്നില്‍ മറ്റ് ചില കാരണങ്ങളുണ്ട്.

തുടക്കം മുതല്‍ തന്നെ ആപ്പിള്‍ തങ്ങളുടെ ഉല്‍പ്പന്നങ്ങള്‍ മറ്റുളളവയില്‍നിന്ന് വേറിട്ടു നിര്‍ത്തുന്നതില്‍ ശ്രദ്ധ കേന്ദ്രീകരിച്ചിരുന്നു. മിക്ക കമ്പനികളും കറുത്ത ഹെഡ്ഫോണുകള്‍ നിര്‍മ്മിച്ചപ്പോള്‍ ആപ്പിള്‍ വെള്ള നിറമാണ് തിരഞ്ഞെടുത്തത്. അതായത്, ആള്‍ക്കൂട്ടത്തിനിടയിലും ഇയര്‍ബഡുകള്‍ തല്‍ക്ഷണം തിരിച്ചറിയാന്‍ കഴിയും. ലോഗോ പോലും കാണാതെ തന്നെ ആളുകള്‍ ഉല്‍പ്പന്നം തിരിച്ചറിയുന്ന ഒരു ബ്രാന്‍ഡിംഗ് തന്ത്രമാണിത്. വെളുത്ത ഇയര്‍ബഡുകള്‍ ആപ്പിളിന്റെ വ്യാപാരമുദ്രയായി മാറിക്കഴിഞ്ഞു.

ഈ വെള്ള നിറം അടുത്തിടെ ഉണ്ടായതല്ല. ആപ്പിള്‍ അവരുടെ ആദ്യത്തെ സംഗീത ഉപകരണമായ ഐപോഡ് പുറത്തിറക്കിയപ്പോള്‍ അതില്‍ വെളുത്ത ഇയര്‍ഫോണുകള്‍ ഉള്‍പ്പെടുത്തിയിരുന്നു. വിപണിയിലെ മിക്കവാറും എല്ലാ ഇയര്‍ഫോണുകളും കറുത്ത നിറത്തിലായിരുന്നു എന്നതിനാല്‍, അക്കാലത്ത് ഇതൊരു പ്രധാന മാറ്റമായിരുന്നു. ക്രമേണ ഈ ഡിസൈന്‍ ജനപ്രിയമാവുകയും അത് ആപ്പിളിന്റെ സിഗ്‌നേച്ചര്‍ ശൈലിയായി മാറുകയും ചെയ്തു.

വെള്ള നിറം വൃത്തിയുള്ളതും മിനിമലിസ്റ്റും, പ്രീമിയം ഫീലും പ്രദാനം ചെയ്യുന്നു. ആപ്പിളിന്റെ ഡിസൈന്‍ എപ്പോഴും ലാളിത്യത്തിലും ചാരുതയിലും അധിഷ്ഠിതമാണ്. കൂടാതെ, വെള്ള നിറം പെട്ടെന്ന് ശ്രദ്ധ ആകര്‍ഷിക്കുകയും ഉല്‍പ്പന്നത്തെ വേറിട്ടു നിര്‍ത്തുകയും ചെയ്യുന്നു.

ആപ്പിളിന്റെ വെളുത്ത ഇയര്‍ബഡുകള്‍ വെറുമൊരു ആക്‌സസറി മാത്രമല്ല, ഒരു മാര്‍ക്കറ്റിംഗ് ഉപകരണം കൂടിയാണ്. ആളുകള്‍ അവ ധരിക്കുമ്പോള്‍ യാന്ത്രികമായി കമ്പനിയുടെ പരസ്യമായും മാറുന്നു. ഇത് ബ്രാന്‍ഡിന്റെ ജനപ്രീതി വര്‍ദ്ധിപ്പിക്കുന്നു. ഇന്നും ആപ്പിള്‍ ഇയര്‍ബഡുകളുടെ നിറം കാര്യമായി മാറ്റിയിട്ടില്ല. ബ്രാന്‍ഡിംഗ്, ഡിസൈന്‍, മാര്‍ക്കറ്റിംഗ് എന്നിവയുടെ മിശ്രിതമെന്ന നിലയിലാണ് അവ ആഗോളതലത്തില്‍ വേറിട്ടു നില്‍ക്കുന്നത്.

Content Highlights : Why does Apple only make earphones in white when most companies make them in black?